کرکٹ آسٹریلیا پاکستان کرکٹ بورڈ کے نقش قدم پر ۔۔عمران عثمانی

کورونا وائرس نے کرکٹ آسٹریلیا کے سنٹرل کنٹریکٹ کے اصول و ضوابط بھی بدل ڈالے،پاکستان کی نقل کرتے ہوئے کرکٹرز کو میڈیا سیشن کے لئے آمادہ کر لیا ہے جس کا آغاز منگل 14 اپریل سے ہوگا.
پاکستان کرکٹ بورڈ نے سب سے قبل یہ خیال عملی طور پر پیش کیا جب ہیڈ کوچ وچیف سلیکٹر مصباح الحق، بائولنگ کوچ وقار یونس اور ٹیسٹ کپتان اظہر علی کے میڈیا سیشن ارینج کئے. اب کرکٹ آسٹریلیا نے بھی اسی فارمولے کو اپناتے ہوئے کرکڑز کے سنٹرل کنٹریکٹ کی شرائط تک معطل کی ہیں.
کرکٹ آسٹریلیا اور آسٹریلین کرکٹرز ایسوسی ایشن کے درمیان 2017 کے طے کردہ سنٹرل کنٹریکٹ کی شرط کے مطابق کرکٹرز کو سالانہ 6 ہفتے چھٹیوں کے ملیں گے ،ان 6 ہفتوں میں پلیئرز کرکٹ آسٹریلیا، آسٹریلین کرکٹرز ایسوسی ایشن اور ملکی کرکٹ ڈیپارٹمنٹ جس کی کوئی بھی نمائندگی کرتا ہے، کو کسی بھی کرکٹ سرگرمی کا پابند نہیں ہوگا حتی کہ میڈیا سیشنز یا ٹریننگ کیمپ سے بھی استثنی حاصل ہوگا. اس اعتبار سے کرکٹرز کے 6 ہفتوں کی رخصتی کا وقت اپریل سے شروع ہوا لیکن کورونا وائرس کے باعث کرکٹرز لاک ڈائون میں ہیں اور کسی بھی ذاتی سرگرمی کا حصہ بننے سے معذور ہیں، اور تو اور قومی کرکٹر ایڈم زمپا کی شادی بھی تاخیر کا شکار ہوچکی ہے. ایسے میں کرکٹ آسٹریلیا جون میں بنگلہ دیش کے خلاف ٹیسٹ سیریز ملتوی کرچکا ہے اور محدود اوور ز کی اگلی سیریز انگلینڈ میں ہے لیکن ایک تو خاصی دور ہے اور دوسری مشکوک ہے. براڈ کاسٹنگ معاہدوں کے تحت بورڈ کو مالی خسارے کا بھی سامنا ہے تو ان تمام معاملات سے نمٹنے کے لئے کرکٹ آسٹریلیا نے آسٹریلین کرکٹر ز ایسوسی ایشن سے رابطہ کرکے پلیئرز کی جاری 6 ہفتوں کی چھٹی کے دوران ان کو میڈیا سیشنز میں لانے کی درخواست کی جسے ایسوسی ایشن نے اپنے پلیئرز سے مشاورت کے بعد منظور کر لیا ہے اس سلسلے میں پہلا سیشن منگل 14 اپریل کو رکھا گیا ہے .آسٹریلیا کے موجودہ ٹاپ اسپنر نیتھن لائن پہلے کرکٹر ہونگے جو میڈیا سیشن میں شریک ہونگے اسکا مقصد براڈ کاسٹر ز کو تازہ مواد فراہم کرنا، قید کرکٹرز کو کرکٹ سرگرمی میں لانا اور شائقین کو ساتھ ملانا ہے.
سینئر کرکٹر مچل اسٹارک نے بھی بریک ختم کرنے اور کسی بھی کرکٹ سرگرمی کا حصہ بننے کا الگ سے اعلان کیا اور اس خیال پر خوشی ظاہر کی ہے.