ملتان :معروف سرائیکی شاکر پروفیسر فدا ملتانی کے بعد پنجابی کے سینئر شاعر خالد سعید قلندر ی بھی طویل علالت کے بعد سوموار کی شام ملتان میں انتقال کر گئے ۔ ان کی عمر 65 برس تھی اور وہ کئی روز سے نشتر ہسپتال میں زیر علاج تھے ۔
خالد قلندری نومبر 1957 ء میں ملتان میں پیدا ہوئے ۔ ان کے والد چاچا جگ بھی پنجابی کے معروف شاعر تھے ۔ خالد قلندری نے اپنے والد کی روایت کو آگے بڑھایا اور ملتان میں پنجابی زبان و ادب کے فروغ کے لیے سرگرم رہے ۔ انہوں نے ولی محمد واجد اور پروفیسر حسین سحر کی رہنمائی میں پنجابی اکادمی کے اجلاسوں میں بھر پور شرکت کی ۔ خالد قلندری کے صاحبزادے انصر عباس جعفری کے مطابق مرحوم کی نماز جنازہ منگل 8 نومبر کو دس بجے جناز گاہ پیراں صاحب نزد پل براراں میں ادا کی جائے گی ۔
ملتان کے ادیبوں شاعروں نے خالد سعید قلندری کے انتقال پر گہرے دکھ اور صدمے کا اظہار کیا ہے ۔ سخن ور فورم کے عہدیداروں وسیم ممتاز ، رضی الدین رضی ، شاکر حسین شاکر قمر رضا شہزاد ، سہیل عابدی ، تحسین غنی ، مستحسن خیال قیصر عباس صابر نے کہا کہ ملتان کے ادبی حلقوں کو ایک ہی روز میں دوسرے صدمے کا سامنا کرنا پڑا ۔ صبح معروف سرائیکی شاعر فدا ملتانی کی نماز جنازہ ادا کی اور شام کو خالد قلندری کے انتقال کی خبر آگئی ۔ انہوں نے کہا کہ یہ دونوں شاعر ملتان کی ادبی محفلوں کو اداس کر گئے ۔
دریں اثناء اردو اورسرائیکی کے معروف شاعر فداملتانی طویل علالت کے بعد سوموار کے روز ملتان میں انتقال کرگئے۔ ان کی عمر57سال تھی اوروہ گزشتہ کئی ماہ سے گردوں کے عارضے میں مبتلا تھے۔
فداملتانی 26دسمبر1965کو ملتان میں پیداہوئے ،انہوں نے یہیں سے تعلیم حاصل کی اورپھرشعبہ تدریس کے ساتھ وابستہ ہوگئے ۔فداملتانی مقامی کالجوں کے ساتھ منسلک رہے ،وہ اردواورسرائیکی نعت کے حوالے سے پہچانے جاتے تھے۔اس کے علاوہ انہوںنے سرائیکی غزلیں اوردوہڑے بھی کہے ۔فداملتانی کی رہائش گاہ پر گزشتہ کئی برسوں سے ہرماہ باقاعدگی کے ساتھ نعتیہ مشاعرے اور میلاد کی محفلیں منعقد ہوتی تھیں۔ ان کے پسماندگان میں بیوہ،پانچ بیٹے اوردوبیٹیاں شامل ہیں۔ مرحوم کی نماز جنازہ ان کی رہائش گاہ شاہ رکن عالم کے قریب ادا کی گئی۔ ان کے جنازے میں ڈاکٹر شوذب کاظمی، شیر افگن جوہر، عماریاسر مگسی، قیصر عمران مگسی، مامون طاہر رانا ،سرور صمدانی ،محمد علی باہوش سمیت ادیبوں اور شاعروں کی بڑی تعداد نے شرکت کی۔ان کی قل خوانی 9نومبربدھ کو ساڑھے دس بجے صبح شاہ رکن عالم کالونی میںان کی رہائش گاہ کے قریب واقع سٹی پارک میں اداکی جائے گی ۔