خوشی آئین میں لکھی ہوئی دفعات جیسی ہے ۔۔ رضی الدین رضی
ہمیں یہ حکم آیا ہے کہ ہم خوش خوش نظر آئیں
سو ہم بھی مان لیتے ہیں کہ ہم خوش ہیں ، بہت خوش ہیں
جو سب کہتے ہیںوہ سب جھوٹ ہے ، ہم مان لیتے ہی
ہمیں تسلیم ہے اب آپ نے جو کچھ بھی فرمایا وہی سچ ہے
یہ جتنی لوٹ ہے سچ ہے
یہاں جو جھوٹ ہے سچ ہے
ہمیں تسلیم ہے صاحب
بہت تعظیم ہے صاحب
۔۔۔
اگرچہ رائیگانی ہے ، دکھوں کی راجدھانی ہے
مگر جو آپ کہتے ہیں
وہی اصلی کہانی ہے
بہت خوش ، ہم بہت خوش ہیں
۔۔۔
ہم آنکھیں صاف تو کر لیں کہ یہ آنکھیں تو جھوٹی ہیں
ہمیں سب کو بتانا ہے کہ آنکھوں میں جو آنسو ہیں خوشی کے ہیں
یہ جو گریہ ہے یہ تو وہم ہے ، بے کار گریہ ہے
انہیں تو ڈھنگ سے رونا نہیں آتا
انہیں تو اپنے پیاروں کو ابھی کھونا نہیں آتا
۔۔۔
چلو ہم مان لیتے ہیں کہ تاریکی بھی روشن ہے
چلو ہم مان لیتے ہیں سہولت میں یہ جیون ہے
چلو ہم مسکراتے ہیں
بتاتے ہیں کہ ہم خوش ہیں
ہمیں خوش خوش نظر آنا ہے دنیا کو
خدا کا فضل ہے ہم پر
سر وں پر آپ کا سایہ ، ہے ہم خوش ہیں
۔۔۔
چلو ہم مان لیتے ہیں کہ تاریکی بھی روشن ہے
چلو ہم مان لیتے ہیں سہولت میں یہ جیون ہے
بہت مہکا یہ آنگن ہے
لٹیرے آپ تو ہر گز نہیں ہم ہیں ، بہت خوش ہیں
کہ اب کے خشک سالی بھی تو کچھ برسات جیسی ہے
خوشی آئین میں لکھی ہوئی دفعات جیسی
سو ہم دستور پر خوش ہیں
ہمیں یہ حکم آیا ہے کہ ہم خوش خوش نظر آئیں